i...

i6

i jada bez Siymce dwa siedym, na M1, po śmiera, bo keta musza naszmarować, a późni naszpanować; koło niy może stoć w antryju, launa sie robi na placu, to cza zubrować, i małolaty jadom zy mnom, ale take fest wyrośniynte co to niy bojom sie larmować i ciepać ausdrukami na łokoło, i stajymy na Bańgowie, na przystanku, i te małolaty wyłażom z busa, bo na nich dran, ale łostatni z nich zaczymuje sie na schodach, podnosi rynce do góry i rycy na cały fol – „A terozki w tym busie jadom same gorole”, wysiodłech; śmiera kupiłech u nos na łosiedlu.

***

i stoja u nos na przystanku, podłaża do rozkładu badnonć na busa i wyłazi na to, że za łozym minut mom, i ida sie stanonć dalij, bo widza że raja sie robi i ludzie zaczynajom sie ciś na siebie, bo kożdy sce łobejrzeć o kryj mo, i łoroz jedyn synek klepie drugego w ramie, chyba sie znajom – „cześ, a ty kaj jedziesz?”; „jo? Na Bangów, na ta pierdolono wiocha”, i za plecami słysza – „no, ty kurwa łobejrzysz jak ty wyjdzies na Bańgowie”

***

i jada przegubowym sto czi czi na Siemce z Kato, siedza na zadku, przy łostatnich drzwiach, i naprzeciw mie siedzi baba, bokiem do kerunku jazdy, i słabi mie już ta rajza po lekku, bo gorko w tym busie, i na Alfrydzie baba pakuje manele i wyłazi, a na zicu pojawio sie przepiynkny napis – „Opamiyntej sie rodaku (gorolu)! Ślonsk jes ino dla Ślonzoków”, i ciesza sie że take napisy som w busach kere jeżdzom za Brynica.